ان جاك الموت

إذا جاك الموت يا وليدي
موت على طول.
اللي اتخطفوا فضلوا أحباب
صاحيين في القلب
كإن ماحدش غاب.
واللي ماتوا حتة حتة
ونشفوا وهم حيين..
حتى سلامو عليكم مش بتعدي
من بره الأعتاب
أول مايجيك الموت .. افتح.
أو ماينادي عليك .. إجلح.
إنت الكسبان.
إوعى تحسبها حساب.!!
بلا واد .. بلا بت.
ده زمن يوم مايصدق .. كداب.!!
سيبها لهم بالحال والمال وانفد
إوعى تبص وراك.
الورث تراب
وحيطان الأيام طين
وعيالك بيك مش بيك عايشين..!!

عبد الرحمن الابنودى

القصيدة كاملة

I need to believe in me !!

Dad: The secret ingredient of my secret ingredient soup
is... Nothing!
You heard me. Nothing!
There is no secret ingredient.

Panda: Wait, wait. It's just plain old noodle soup?
You don't add some kind of special sauce or something.

Dad: Don't have to.
To make something special...you just have to believe it's special.

المشهد دا من اخر فيلم كونج فو باندا ، لما كان البطل خلاص حس خلاص انه مش فى مكانه الصح وانه ولا ليه اى لازمة فى الحياة
فوالده كان بيشجعه .. و يقوله لا انت سبيشال وفكر فى نفسك على انك كده .. و الكثير من هذا الكلام

الواحد دايما بيحتاج حد يقوله الكلمتين الحلوين دول يمكن يعملوا صدى جوا روحع المفضية من صريخ بن يومين

لكن تعمل ايه لما تلاقيك بتتريق على نفسك واللى حواليك حاطين ايديهم على خدهم ومش طالباك بصراحة تطلب تشجيعهم .. و المنافسين باينين اوى و اكثر قدرة منك بمراحل !

every one seems smarter, nicer, stronger, more elegant,more realistic ... etc
من الاخر .. احلى فى كل حاجة حلوة و اقل سوءا فى الحاجات الرخمة

وتبدأ تحس بالاحباط .. و تبدأ احلامك تضمحل شيئا فشيئا ..
المنافسين من مستواك - او ما هو مفترض انه مستواك - اصبحوا اعلى منك .. و من هم اقل منك انت لا تراهم اهلا لمنافستك الان ( لانك اجبن من الاعتراف بالحقيقة المرة ) .. وبس

ونقف فى منتصف الطريق .. لا نكمل ولا نرجع
و على رصيف منتصف الطريق .. و آآآآآآآدى قعدة ..

منور !

انا مش عارفة ليه الناس بترخم علينا فى حكاية التشجيع دى .. ما تقولوا كلمة توحد ربنا طيب !
هو الكلام بفلوس ؟؟
ايوة اكدبوا .. لو مش مقتنعين بقدراتنا اكدبوا .. مش لازم تتريقوا و الحركات دى يعنى ( مش قصدى كدب بمعنى نفاق .. بس الواحد ممكن يلف الكلام بشكل مهذب ميضايقش وفى نفس الوقت ماهواش مدح صريح .. )
و تنشفوا ريقنا وفى الاخر تقولولنا .. يعنى .. مش وحش !

كتر خيركم والله

انا بالمناسبة مش محبطة دلوقتى وانا بكتب الكلام دا الحمد لله
و ريقى مش نشفان الحمد لله .. انا بقيت بنفض اغلب الوقت ومش مستنية تشجيع .. انا بقيت دايما بخلى تحقيق الهدف الصغنون ايا كان الهدف هو التشجيع اللى بجد
لما تقف قدامى مسألة او اسأل لنفسى سؤال وادور على اجابته واعرفها بنفسى برضة بيبقى هو دا تشجيعى لذاتى

والحمد لله ربنا رزقنى بأهل بيشجعونى من حين لاخر وبيدعولى كتير .. و تريقتهم مش بتجرحنى لانها بتبقى دايما ( هزار العشم ) ..
الحمد لله

انا بس بقول الكلام دا للناس اللى بتنشف ريق الناس التانية ..
مش لازم تكون فى موضع مسئولية .. ممكن جدا يكون اخوك او اختك الصغيرة هما اللى محتاجين التشجيع دا فى رسمة بيرسموها او شخابيط فى ورقة وهما بيتعلموا حاجة سهلة
مش لازم تكون حاجة مهمة و الناس ترجعلك وتاخد رأيك ..
ممكن تعبر عن تشجيعك بطرق كتير اوى .. بس لو كل واحد قام من على الرصيف و ارتحل للامام وشد اللى معاه للامام .. ربنا هيفتحها عليكو

عن ميكى و بطوط و أبو زنة ..

انا قريت قصص حلوة في ميكي كتير .. ومحدش يقولى انتى كبرتى على ميكى عشان دا كلام فاضى

انا من زمان وانا مع ميكى .. و مستقبلى ما زال معاه ان شاء الله
دانا حتى كتير كنت بقول لنفسى مش هتجوز الا واحد بيحب ميكى عشان يجيبلى كل شوية واحدة او يجيبلي العدد الجديد وهو جاى البيت
وما زال الحلم قائما

المهم .. ما علينا
انا لسه لحد دلوقتى بقرأ ميكى فى أى مكان .. و لما باخدها من حد من صحابى فى الكلية ممكن جدا اقعد اقراها فى المدرج فى نفس اليوم قدام الناس من غير ادنى احساس بالخجل ..

لانى مش مقتنعة ان ميكى للأطفال بس او ان أدب الاطفال للأطفال فقط يعنى ..
اللى بيكتبوا أدب الاطفال دول عالم كبار و معجزين كمان ..
و بعدين ايه المشكلة ان الواحد يستمتع بحاجة ترسمله على وشه ضحكة صافية من القلب بغض النظر هى طفولية ولا لأ ..

وهفضل اقرا ميكى لحد ما اموت - يارب ميبطلوش ينزلوها هى كمان - و هعلم ولادى يقروا ميكى ويقروهالى لما نظرى يضعف ومبقاش قادرة اقرا ..

لأنى مؤمنة ان الشباب هو احساسك بأنك شاب .. والشيخوخة هو احساسك بالشيخوخة
لكن انا مقتنعة انى طفلة و هيفضل جوايا الجزء الطفولى للأبد .. يمكن تغطيه حاجات كتير تانية بمرور الزمن .. لكن ان شاء الله هيفضل موجود .. و هفضل أحبه و اظهره فيا و متكسفش منه .. لانه يمكن أحلى حاجة فيا اصلا ( مقارنة بالباقى )

بس سيبونا من الكلام الكبير دا .. انا نفسى احكى شوية عن قصص قريتها فى ميكى وحبيتها .. ومعلمة معايا لحد دلوقتى مع انى يمكن قريتها من سنين

انا بحب جدا لما بطوط وابوزنة يقعدوا يتخانقوا .. بتبقي قصص فظيعة

مرة كان فيه قصة كده بطوط وابو زنة بيتخانقوا وبعدين بطوط لقي كتاب عن العلاقات السلمية والحاجات دي واقتنع بيها وقرر انه ميتخانقش مع ابو زنة وبدأ يحاول يخلي ابو زنة يقرا الكتاب فكل ما ييجي يكلمه ابو زنة يفتكر انه بيعمل فيه مقلب وميرضاش يسمعه ويروح يعمل هو فيه مقلب وهكذا .. كان فيه لقطة كده بطوط بيحلم بحمامة ماسكة غصن زيتون وبتطير وهيروح يكلم ابو زنة فدا هيضربه باين هيخبطه في شجرة زيتون فبطوط هيطير يدخل من الشباك بتاع اوضته وفي بقه غصن زيتون كده بعدين في الاخر ابو زنة هيسمعه و هيقوله هات الكتاب اقراه وفي الاخر هيتخانقوا مين يقرا الكتاب الاول والكتاب هيتقطع

قصة تانية ابو زنة وبطوط برضة .. فيه قنبلة تحت بيتهم وهما عمالين يتخانقوا ويبعتوا لبعض متفجرات وحاجات جامدة وبعدين بطوط هيجيله مندوب يقوله خلي بالك من القنبلة فهو هيحاول ينبه ابو زنة وبرضة ابو زنة مش هيرضي يسمعه وهيفضلوا كده لحد ما ابو زنة ياخد باله ويبطل يعمل متفجرات ولما يهدي القنبلة هتنفجر

وفيه برضة قصة ابن عم دهب لما نزل مدينة البط وعاش مع بطوط وكان بينافسه علي الكأس الذهبية بتاع الالعاب الاوليمبية .. كانت تحفة اوي الراجل دا كان اسمه ماكبط .. و عاش مع بطوط عشان دهب كان بخلان عليه بأنه يقعده معاه ..
و بعدين هيتحدى بطوط فى كل الرياضات و هيغلبه الا فى واحدة بس وهى الرمى بالقوس لأنه من كتر ما عنده عضلات هيبقى مش عارف يمسك القوس صح وفى الاخر الاولاد هيعملوا حركة ظريفة ويسافروا ويسيبوا ماكبط يقعد عند عم دهب اللى بياكل كل يوم كتير اوى و بيخلص التلاجة يوميا

وبرضة قصة كان بطوط لقي الاطفال بيكذبوا عليه كتير فراح قال لعبقرينو فعبقرينو اداله سوار حديد كده لما حد يلبسه ويكذب بيتصعق صعقة خفيفة .. بعدين الاطفال هيعترضوا وهيقولوا بطوط لازم يلبس هو كمان وهيلبسوا هما الاربعة وهتحصل مواقف طريفة جدا بسبب انهم مش قادرين يكذبوا ومضطرين يكذبوا زي ما واحدة تخينة توقف بطوط في الشارع تقوله بدلع جوزي بيقول عليا تخينة هل انا فعلا تخينة فبيبقي مش عارف يقولها ايه
وهكذا بقي

ومرة برضة زيزي اتخانقت مع بطوط عشان فقير ومش بيجيبلها حاجة فراح لعبقرينو فاداله آلة بتقلد الجواهر فهو راح واخدها وجري عمل لزيزي جواهر كتير وراح وداها لزيزي.. وبعدين في الاخر هيكتشف ان الجواهر دي بتسيح بعد مرور 24 ساعة عليها كان فيه لقطة كده في الاخر زيزي كانت لابسة جواهر كتير وبعدين كلها ساحت وطلعت تجري ورا بطوط وهي متنرفزة

وبرضة قصة كده كان عم بطوط وعم دهب في مدينة غريبة مش فاكرة كانوا عايزين ايه وكل يوم ياكلوا كوسة لحد ما اخضرّوا عشان عم دهب بيوفر وبعدين في الاخر عم دهب هيزهق من الكوسة ويديها كلها لبطوط فبطوط هيبيعها بتمن غالي اوي لأهل المدينة اللي عمرهم ما كلوا كوسة وهيفرحوا بيها اوي و ييجى بطوط فى اخر لقطة عمال يجر عربيات عليها دهب كتير و عم دهب مفروس جدا

وبرضة قصة كده الاولاد عملوا عنصر كيميائي جديد اسمه سوستوتلوليوم والعنصر دا هاجم بطوط وخلي ايديه تكبر فجأة وحكاية طويلة كده في الاخر هيعرفوا يصغروا ايديه و هتيجي اخر لقطة وهو بيقولهم بكبرياء انا هروح البيت ..
ايديه صغيرة بس دماغه كبرت اوي

وقصة كمان كده كان فيها بندق راح يصطاد و مسك اسمكة ازرق في ابيض شكلها حلو اوي فعجبته بس هربت منه فزعل اوي وجاله انهيار وبدأ يحلم بيها وهو نايم وكده فميكي هياخده مرة كده للبحر يدوروا عليها وهتحصل عاصفة وهيمسكوها بالصدفة .. وبعد ما يمسكوها بندق هيسيبها عشان لما مسكها كان شكلها حزين اوي !

و فيه قصة كده لما بطوط جاله اكتئاب عشان مش عارف ينام فالدكتور يقوله يروح يغزل تريكو وكروشيه وهو جاب الابر وبدأ يشتغل وبعدين بطوطة عرفت وقالت لنادي السيدات وكان نفسهم اوي يشوفوا شغل التريكو بتاعه وجم كلهم ورا بطوطة علي بيت بطوط وهو هرب منهم وفضلوا يطاردوه في مدينة البط لحد ما هو استخبي في قفص القرد في حديقة الحيوانات واخيرا ساعتها عرف ينام مع القرد

ولما جه ناس من بلد تانية كده وخلوا بطوط هو ( دوق لاتدوق ) عشن هو الوريث الوحيد بعد ما الملك مات وهيطلع في الاخر انه مش هو خالص
القصة بتحكى عن مملكة ( لا تدوق ) اللى الدوق بتاعهم مات و دوروا على وريث فلقوا بطوط - الساكن بشارع التفاح .. هيروحوا يقولوله و هو هيفرح جدا و هيروح هو والاطفال المملكة و يتعاملوا معاملة الملوك بقى و بطوط بيتدلع .. و زيزى كانت معاهم و هتلاقى بطوط مش مهتم بالشعب و الاطفال عاملين الترابزين بتاع سلم القصر زحليقة واللى زاد وغطى ان فيه اميرة بطوط لازم يتجوزها عشان حاجة سياسية كده يعنى .. و بعدين هى هترجع مدينة البط زعلانة وهتقابل الجدة بطة و تقولها بطوط هو وريث عرش ( لا تدوق ) فقالتلها لو بطوط وريث يبقى انا ملكة النرويج
و جابتلها شجرة العيلة و راجعوها فاكتشفوا ان الوريث الحقيقى هو مبطوط-الساكن بميدان التفاح هياخدوا الراجل التانى - كان شكله ظريف جدا - و هيروحوا المملكة .. ينقذوا بطوط قبل ما يتم تتويجه مباشرة و يوضحوا خطأ الناس بتوع ( لا تدوق ) و هياخدوا بطوط ويرجعوا وعلى السفينة اللى راجعين فيها .. بطوط وزيزى كده والاطفال كده
عشان كانوا مستمتعين جدا بحياتهم هناك

ولما كان عم دهب بيحاول يبيع اخر ربع جنيه من سنة مش عارف كام ووقع في المجاري ونزل يجيبه وقابل الناس بتوع اطلانطس

وبرضة القصة بتاع لما راحوا الاسكيمو ثاني اسوأ مكان للفسحة في العالم " نفسي اقراها تاني "

وقصة بطوط لما حاول يفوز بجائزة ( اسوأ لاعب بولينج ) ومعرفش برضة .. كانت ظريفة اوى

و قصة كده لبطوط وعم دهب والاطفال لما راحوا بقوا رعاة بقر وكان الاطفال بيطبخوا فكانوا بيعملوا اكل وحش جدا وبعدين جه حرامية يسرقوا الماشية و حصلت شوية حاجات كده و في الاخر كان فيه قطر هينفجر و عم دهب عملله عقبة علي السكة الحديد عن طريق الاكل حط البسلة والرز و الحاجات الحجرية دي وبعدين حط فوقيها كريمة زي الاسمنت كده القطر جه عندها وراح ناطط لفوق وبعدين نزل تاني بس بعيد وانفجر بعيد عنهم
كانت قصة مسخرة اوي ..
كانت ميكي جيب

وبرضة قصة تانية لما بطوط راح يشتغل في مزرعة عنترية الجنوبية وكان فاكرها في امريكا الجنوبية وحر بقي وقاعد في الطيارة بالشورت وبعدين اكتشف ان المزرعة في القطب الجنوبي !!


برضة القصتين اللى بحبهم اوى هما القصتين اللى قدرت ألاقيهم عن شباب دهب ..المفروض انهم كانوا اكتر من 9 اجزاء متسلسلة بس للاسف لما كانت بتنزل مكناش بنشتريها
المهم الحلقة 7 اللى قريتها كانت بتتكلم عن دهب لما رجع لعيلته فى اسكتلندا بعد ما عمل فلوس وهياخد اخواته البنات الاتنين لمدينة البط اللى اشترى منها جزء كبير
والحلقة 9 بقى اللى مسخرة فعلا فى مدينة البط لما اخت عم دهب - ام بطوط - هتقابل واد مجنون كده - أبو بطوط و الاتنين عصبيين جدا و بيتخانقوا و يضربوا بعض وبعدين تروح علامة القلب تظهر فى عنيهم و يبدأوا يتنحوا ويبقوا هبل من كتر الحب .. ودهب يجر اخته من قفاها عشان واقفة تبحلق فى الواد وهو كذلك
لا بجد قصة مسخرة
ضايعة منى للأسف دلوقتى

قصة كانت فى ميكى جيب لما كانت زيزى بتعرف تطبخ اوى و بتعمل كعك بالليمون رائع و بطوط قالها متسكتيش على نفسك لازم تروحى لناقد اكل عشان لما ياكل اكلك هينشروا عنك فى المجلات
وبعدين هى هتروح لناقد معين مش هيرضى يقابلها فهتفضل بقى كل ما يروح حتة تروح وراه .. ولو راح مطعم تدخل هى مع الخدم و تبدل الحلو بتاعه وتحط من الكيك بتاعها و هو يتضايق و ميرضاش ياكل عشان كان طالب آيس كريم مش كيك
و بعدين هيسافر معرفش فين كده و هتروح وراه ويهتسلق جبال تتسلق معاه و بعدين هتحاول تعرض عليه ياكل من الكيكة بتاعتها وهو بيتسلق الجبال هيتخض ويقع و رجله هتتكسر
هى هتفضل تدور عليه مش هتلاقيه والليل هييجى و هتتوه وتبدأ تجوع .. ولما تلاقيه بقى فى الاخر هيقولها انا وافقت ادوق كيكتك قالتله للاسف انا من كتر جوعى دقت منها حتة لقيتها لذيذة جدا رحت اكلتها كلها ..
وبعد ما هترجع مدينة البط هتعزم بطوط على كيك تانى بالتفاح باين هيقوم يعجبه اوى و يقولها متسكتيش على نفسك الخ الخ .. هتروح ملبساه فى الطبق

و قصة تانية لما كانت هتاخد بطوط معاها حفلة كده - زيزى يعنى - و بعدين هو لقى نفسه تخين على بدلة السهرة فهيبدأ يقوم بتمارين عشان يخس و فضل يجوع فى نفسه وهيتراهن مع زيزى انه هيقعد يوم كامل من غير اكل .. و هيجوع فى اخر اليوم و هيفطر قبل الـ 24 ساعة ما تخلص ب 5 دقايق على حتة شيكولاته و بعدين زيزى هتشوفه و هتزعل معاه وتمشى زعلانة
وهو هيطلع يجرى وراها تقوم عربية تخبطه ويقع على منقاره و اخر لقطة كان منقاره مربوط والدكتور بيقول هيقعد شهر بياكل شوربة بس

افتكرت برضة قصة قديمة لبطوط كانت فى ميكى جيب .. مخترع كبير كده قدر يعمل جهاز بيغير طبيعة العقل اللى قدامه و قدر يخلى الكلب بتاعه عبقرى رياضيات
هيتصل بعم دهب و هيقوله على الاختراع و مش عارف مين حد كده - شرير وخلاص - هيتصنت على المكالمة و هيسرق الجهاز من عم دهب و هيخلي عاوز يروح مستنقعات الندم
و بعدين عم دهب هتسيطر عليه الفكرة و هيروح يحجز اول طيارة للمستنقعات فهيقابل بطوط فى السكة فهيقوله رايح فين يا عم دهب هيقوله انا معرفكش انت غريب انت بتكلمنى ليه و هيزقه باين يوقعه على الارض و يطلع يجرى على المطار
بطوط هيستغرب اوى فهيحاول يجرى وراه يفهم ماله فالراجل باين هيروح ضارب بطوط بالجهاز هيخليه هو كمان عاوز يروح مستنقعات الندم .. و الاولاد هياخدوهم يودوهم و اصلا عم دهب وبطوط كل شوية يقولولهم انتو اطفال غرباء لكن مش مهم هنسيبكم تساعدونا
و لما هيروحوا هناك هيبقوا عاوزين ينطوا فوق التماسيح و حاجات خطيرة كده والاطفال ينقذوهم .. وبعدين الراجل الشرير هيبدأ يضرب فى مدينة البط كلها و بتاع وكل المدينة هاتبقى يا اما فاكرة نفسها حيوانات يا عاوزة تروح مستنقعات الندم .. وشوية مواقف ظريفة كده هتحصل
وبعدين الناس بتبدأ تفوق من تأثير الجهاز و يقعدوا يسألوا ايه اللى جابنا هنا عاوزين نرجع و الكلام دا .. و مش فاكرة عم دهب وبطوط والاولاد هيقدروا يرجعوا ازاى بس هيرجعوا لكن مدينة البط فاضية خااالص والراجل الشرير خلاص اتجنن من العظمة .. المهم هيوجهوا عليه الجهاز مش فاكرة ازاى برضة و الخير هينتصر فى الاخر
القصة احلى حتة فيها الحتة بتاع مستنقعات الندم ولما كل شوية يكلموا الاطفال يقولولهم انتو اطفال غرباء .. بتبقى ظريفة اوى

وفيه قصة لبندق كان بيتعلم فيها اللباقة برضة كانت قصة جامدة اوي .. بس انا مش فاكراها تقريبا

و المشكلة ان فيه قصص كتير تانية حلوة قريتها بس مش فاكراها دلوقتى خالص

خاطرة

ارمى اوراقك كاملة .. وسأرضى عن أى قرار

يدوى صوت كاظم فى خلفية المشهد .. لم تكن تظن انها قد تفعل هذا يوما .. كانت ترفض حذف اى شىء كتبته يوماً ما .. تقول له فى مرح .. احذف شيئا كتبته يعنى ان احذف شيئا تركت فيه بضعا من روحى .. وهذا لا أسمح به ابدا
ترمق اللهب المتصاعد من كومة الاوراق على ارضية شرفتها .. تشعر ان الوجود يهتز من خلف النيران .. كانت تحب هذا التأثير بشدة يوما ما .. تعشق فكرة ان الوجود يهتز وهي ثابتة .. وسخونة النيران تعطيها احساسا دافئا بالامان

اليوم لا تعطيها تلكم النار الصغيرة اي احساس .. بل ربما نزعت من داخلها كل أمان شعرت به يوما ما .. مدت يدها بداخل الحقيبة لتشد باقى وريقات حب كتبتها له يوما ما .. فتفتت تحت يديها وريقات وردة اخذتها منه يوما ما .. يوما ما كانت فيه سعيدة فيه بوهم ما
لم يبق شيء بداخل الحقيبة .. فقط بقيت غبار من زجاجة عطر تعطرت بها يوما ونامت تحلم بطيف عطرى يضمها .. حرصت علي تكسيرها جيدا .. ولو استطاعت لأعادتها الي الرمال التى صنعت منها ..
وخزتها بعض بقايا زجاج أبت ان تنكسر .. قلبت الحقيبة ارضا .. اختلط الرماد ببقايا ورد ببقايا زجاج كاد يتحول الي رمال .. بحقيبة حوت يوما ما كانت تظنه اعز ما تملك

Back ...

الصورة دى لذيذة جدا .. معبرة اوى عننا كطلبة جامعيين بؤساء
بس هى ملعوب فيها
.. الصورة الاصلية كان بيبقى مكتوب فيها back to school
حتى الواد اللى فى الصورة شكله راجع خامسة ابتدائى اصلا مش منظر واحد جامعة خالص

بس انا حبيت اجيب الملعوب فيها عشان عجبتنى اكتر .. وما تسألونيش ليه

برغم غتاتة الكلية .. بس واحشانى
وحشنى التغليس على معيديننا .. و تغليسهم المقابل

وحشنى الحلم بأنى اول واحدة هجاوب السؤال الصعب .. و ان لما ييجى امتحان مفاجىء هحل كويس
وحشنى تصحيح الشيتات و كمية المناقشات والجدل المملة فعلا بس ممتعة ليا جدا

وحشنى الفخر لما اعمل حاجة صغيرة او اشرح حاجة لحد وتكون صعبة بس يفهمها منى
وحشنى مساعدة الناس فى مذاكرتهم .. مع انى انا نفسى مبذاكرش !

وحشنى اصحابى وقعدتنا .. وسندوتشات الفول والطعمية والبطاطس بتاع سندباد ..
و الخناقة بتاع كل يوم .. نروح هندسة ولا منروحش ؟

انا قلت وحشنى كتير اوي
بس خلاص مش هقولها تانى ..

السنة ان شاء الله .. هتكون غير
( مع انى مش بحب اتكلم خليجى بس الكلمة عاجبانى )

هتكون غير اوى .. فى كل حاجة فى الالتزام والمذاكرة و التفكير و البحث و التركيز و مدى الاحتفاظ بالمعلومة والتطبيق العملى ( لو لقيت حاجة تانية اتغير فيها مفيش مشاكل )

ان شاء الله

الكلمتين دول هيشهدوا عليا .. هاجي اخر الترم او اخر السنة ابص عليهم و هكتب بوست تانى - ان شاء الله لو احيانى الله - اقول فيه رد فعلى لما قريت كلامى القديم

back to college

my new another blog ...

I write here for you

This blog is mainly based on English posts that explain the integrity and peace of Islam,

My friend Alshimaa Helmy is the first writer in it
but yesterday I joined the blog to help her ..

We are trying to get the non-Arabs Muslims and help them know Islam properly
please visit us, encourage us and tell every body you know about this blog ..
it will be a ' Sadaka gareya' for you InShaaAllaah

we are waiting for your questions, critiques and all your advices

I'm sorry for my bad English, It has been a long time since I wrote in English
May it'll improve with time

Thank you

حلم من اكبر احلامى ..

الصورة دى جميلة بشكل .. كمية المشاعر اللى ثارت فى نفسى وانا بتأمل فيها كانت فوق احتمالى
بتحس كده ان فيه حلم جميل بيتشكل فى افق خيالك .. حلم اسرة سعيدة .. طفلة رائعة الجمال - ما شاء الله - زى دى مع اب زى دا
اب بنته بتحبه مرضيتش تفارقه حتى وهو بيصلى ووقفت جنبه !!

حلم اسرة بتعيش لربنا .. حتى اصغر حد فيهم اللى لسه مستوعبش ايه ربنا

حلم فطرة سلمية لطفلة هى اللى تعلمنا مش احنا اللى نعلمها ..
او طفل مفيش مشاكل

الاطفال .. مهجة القلب

انا قلبى بيدوب لما بشوف طفل .. فمش متخيلة انا قلبى هيعمل ازاى لما اشوف ابنى/بنتى !!

مجرد التفكير فيهم بالنسبالى بيعتبر جائزة اليوم .. الشىء اللى لو عملته صح بوعد نفسى بيه .. وبقولها هخليكى تحلمى بيهم شوية وتخططى هيكبروا ازاى و يعملوا كل حاجة حلوة فى الدنيا .. قصدى ادونيا ( كما ينطقها اطفالى )

يارب ارزقنى بهم اولادا طائعين لك محبين رقيقى القلب محسنين حسنين .. بارك الله لكم وبارك فيكم ..

رمضان 1430 هجرية

بعد مرور 6 ايام كاملة على انتهاء رمضان .. ربما اجد الان الشجاعة للتحدث عنه
لا اعنى الشجاعة بمعناها الحرفى .. بل اعنى شجاعة تحمل ما سأكتبه ها هنا .. لانى تقريبا ابدأ عهدا جديدا فى حياتى اتمنى ألا ينتهى
او ربما انهيه لابدأ عهدا اكثر قربا من الله و محبة

رمضان السنة دى .. كان بجد اجمل رمضان مر عليا فى حياتى .. كل الرمضانات اللى فاتت .. كانت فى الاغلب بتنحدر من سيء الى اسوأ
من محاولة لختم القرآن مرتين الى محاولة ختم نصف القرآن .. من التمسك بالسنن والتراويح الى مرحلة اداء الفروض بالعافية
و الكثير والكثير من فعل اللاشىء فى وقت ثمين جدا يستحق ان تحاول ان تفعل فيه كل شىء
والكثير من النوم والملل .. و النظر الى كل هؤلاء الذين يبكون لانتهاء رمضان فى حيرة .. هما ليه بيعملوا كده ؟؟؟

لكن هذه السنة كان مختلفا ... كان جميلا .. كان صفيا نقيا حبيبا ..
وسيكون اكثر من هذا فى عمرى القادم بأذن الله ..

رمضان السنة دى ... صلاة وتراويح .. ولاول مرة فى حياتى نزلت التهجد
و تجربة العودة للبيت بعد صلاة التهجد والفجر و العصافير تشقشق و هواء البكور الجميل جدا يمسح وجهى بحنان ... انا اصلا بحب الوقت دا جدا وبالنسبالى من اجمل اوقات اليوم
اضف على هذا كونى خارجة من لقاء مع الله .. و بكل الخواطر الروحانية التى تمر بى ..
كان تاثير هذا من الجمال مضاعفا

رمضان السنة دى .. موقفش عند ختم القرآن .. بل اشتركت - مع واحدة من اعز صديقاتى - على حفظ بعض السور ..
ونجحت الحمد لله و نويت اننى لن اتخلى عن هذا طيلة السنة وليس رمضان فقط
ولن اتوقف عن الحفظ ان شاء الله حتى يمن الله على بختم حفظه

رمضان السنة دى .. اجتماع على فعل الخير ..
نزلت جمعية رسالة السنة دى انا وبسمة وريهام واشتغلنا معاهم .. وحضرنا معاهم يوم الكساء كمان و كملنا لاخر اليوم
يوم الكساء دا كان يحتاج بوست لوحده اتكلم فيه عنه .. بس الحقيقة انا اللى مكسلة اوى

رمضان السنة دى تابعت فيه 3 برامج دينية .. قصة حب لمصطفى حسنى و قصص القرآن 2 لعمرو خالد و خواطر 5 لأحمد الشقيرى
و دا لنك تانى لخواطر 5 عشان الاولانى مش حاطط الحلقات كلها

والبرامج دى كل واحد فيهم غير جوايا حاجات كتير اوى وعرفنى على حاجات جميلة .. ياريت كلكم تنزلوا الحلقات وتتفرجوا عليها
بجد هتستفادوا كتير

رمضان السنة دى اخدت فيه قرارات كتير اوى .. يمكن اقدر اعمل حاجة مفيدة بيا وبحياتى زي ما بحلم لنفسى فعلا

1- احافظ على مواعيدى ومروحش متأخرة زي ما اعتدت فيما سبق ..
2- احترم دايما الناس ومتكلمش مع اى بشكل مش مهذب (ادفع بالتي هي أحسن فإذا الذي بينك وبينه عداوة كأنه ولي حميم)
3- انجح فى دراستى بشكل استغل فيه كل قدراتى العقلية اللى ربنا حبانى بيها .. واتعامل دايما مع معلمينى بشكل مهذب
4- اساعد فى البيت مع ماما وبابا .. و احافظ على برهم و حبهم
5- انشر علمى بكل الطرق .. كلها بمعنى الكلمة
واللى شجعنى على كده اوى حديثين كنت دايما اقراهم و محسش بيهم زى مانا حاسة بيهم دلوقتى

قال رسول الله صلى الله عليه و سلم (اذا مات ابن ادم انقطع عمله الا من ثلاث صدقة جارية او علم ينتفع به او ولد صالح يدعو له )
روي في جامع الترمذيّ بالإسناد الصحيح أنّ رسول الله صلى الله عليه وسلم قال: ( لا تزول يوم القيامة قدما عبد حتى يسأل عن أربع عن عمره فيما أفناه وعن جسده فيما أبلاه وعن علمه ماذا عمل به وعن ماله من أين أخذه وفيما أنفقه )

6- محاولة انى اكون دوما مثال للمسلم الخلوق .. بمعنى انه على خلق .. بكل ما تعنيه الكلمة

باقى قراراتى تعتبر شخصية بشكل مبالغ فيه مش هحب انى اعلنها .. لكن انا حبيت اعلن دول مش لانى بحب اشرك الناس فى حياتى والكلام دا
انا بس بقوله من قبيل ان حد يتشجع وياخد خطوة و يبتدى حاجة مفيدة فى حياته
و يمكن كلمة من كلامى تحرك حاجة جوا حد

ويارب اعنّى على نفسى

ومش عاوزة اللى يقرا كلامى يفتكر انى البنت المتدينة اوى بقى وياما هنا وياما هناك
لا انا للاسف لا هنا ولا هناك .. يا ريتني اكون
انا واحدة من وسط القطيع .. بس بحاول اوجه نفسى لاتجاه صح حتى لو مغاير لاتجاه القطيع

والحق احق ان يتبع

يا ريتك مش رايح

تدير المفتاح في قفل الباب فيحدث صوتا خافتا عاليا بسبب الصمت المحيط المخيم علي المكان .. تفتح الباب برفق شديد وتدلف إلي الداخل و تغلقه خلفها برفق أشد و هى تشعر أنها احدثت ضجة لا يمكن احتمالها ..
تخلع خفيها في بطء وهي تزفر بعمق .. تدور بناظريها حولها في المكان المضاء بضوء خافت من مصباح ضعيف الاضاء .. يحب ابنها هذه الاضاءة كثيرا .. لانه يكره الظلام اما النور الباهر فيتعب عينيه .
كانت هي تكرهها دوما ..فهي تشعرها انه وراء كل قطعة اثاث شبح يتأهب للانقضاض و في كل ركن شبه مظلم تتكون كتلة هلامية مصنوعة من مادة غامضة تقوم بالتأكيد بأكل البشر احياء صارخين ..

تخلع خفيها في بطء وهي تبتسم .. ألن تكف عن هذه الحماقات ؟ .. كثيرا ما ضحك ( احمد ) عليها في حنان وهي تخبره في حماس ضاحك عن هذه الخيالات .. وكثيرا ما ربت علي كتفها في رفق وقال لها ان طفولتها المتوحدة هى السبب الاول في هذه الخيالات التي تداهمها ..
( احمد ) .. يا له من عزيز حبيب صغير دافيء ..

كانت ذكراه فيما مضى تمزقها .. ثم اعتادت ذلك الشىء الدافىء اللاذع الذى يراودها كلما تذكرته ولم تعد تهتم اهو دفء دم جرح الذكرى ام ان الذكريات قررت ان تكون حنونة فجأة ..

وضعت خفيها فى هدوء وهي تزفر ثانية .. مشت حيث يرقد الصالون في الغرفة المفتوحة علي صالة الدار الشبه فارغة .. حين زواجهم كانت تتمني ان يتم ملء بيتها بكل قطعة اثاث ممكنة .. لكن احمد طلب منها في هدوء مترفق ان تترك له غرفة شبه فارغة من الاثاث .. وقتها سألته عن السبب فاخبرها انه يحب ان تكون هناك غرفة ما ليلعب فيها طفلهما بحرية بدون ان يصطدم رأسه بشىء متصلب متحجر يؤلمه ..
كانت تلك اول مرة يأتى فيها علي ذكر اولاده امامها .. وقتها ابتسمت فى حنان وخفق قلبها وهى تتخيل ذلك الطفل الصغير يتحرك بخطوات متعثرة خرقاء و يد ابيه تسنده في نفس الوقت الذى يحدثها فيه عن شون السياسة و كيف ان سعر الدولار ارتفع فجأة وينهي كلامه قائلا .." حاسب يا حماده "

لماذا (حماده ) بالذات ؟ لا تدرى .. كل الاطفال تتم دعوتهم ( حماده ) من حين لاخر حتى ولو كان اسمهم ( تامر ) !

يومها اتفقوا علي صالة شبه خالية من الاثاث لتعطى احساس الرحابة .. وترك غرفة خالية تماما ليتم تأثيثها وقت ان يجىء طفلهم إلي الحياة ..
وتزوجوا في حفل هادىء رقيق .. ومرت شهور زواجهم الاولى فى سعادة طاغية هادئة .. عرفت حقا معنى ان يكون الانسان سعيدا دون ان يملأ الدنيا حماسا وضجيجا .. كان احمد شخصية هادئة جدا علمها الهدوء والترفق في كل شىء

حتى فى اوقات غضبه .. لم تكن لتعرف انه غضب الا من نظرة عينيه .. كانت لديه اجمل عينين حساستين قد يمن الله بهم على رجل ..
والحق انه لم تره غاضبا منها حقاً الا في شهور حملها الاولى عندما كانت تصر بحنانها الدافق ان تقوم بكل شىء فى المنزل كما السابق فيصر هو ان تجلس ولا تقوم بأى شىء .. وتتضايق هى من فرض الاوامر المستفز وتفقد اعصابها وهي علي ما هي فيه من " وهن على وهن " ..

كاد يطير فرحا عندما عرف بحملها .. حتى كادت ان تغار من هذا الطفل الذى منذ بداية بشائره وهو فرح به هكذا .. وبدأوا اخيرا في تأثيث تلك الغرفة الفارغة .. حرص ( أحمد ) على فرش ارضها بموكيت فاخر و لصق ورق ابيض بعرض حوائط الغرفة ليترك للطفل حرية الرسم .. او الشخبطة ان صح التعبير
ثم فاجأها بهدية لذيذة للغاية .. كرسى هزاز
وقال لها مفسرا عندما لمح النظرة غير المصدقة في عينيها .. ( عشان متتعبيش من هزه اصل العيال بيحبوا يتمرجحوا ) .. ضحكت في مرح و تحركت في بطء ناحيته لتحتضنه .. ولولا بطنها المنتفخة لكانت قد دفست نفسها وسط ضلوعه ..

( تعرف انى كان نفسى اوى في كرسى هزاز وانا صغيرة .. ) قالتها في شرود وهي تتأمل الكرسى يتحرك بتأثير نسمات الهواء في ركن الغرفة البعيد وهي مستندة علي كتفه وهما جالسين علي ارض تلك الغرفة العزيزة .. ذلك النموذج المصغر من الجنة في بيتهم ..
ضحك في مرح ضحكة عالية و رفع يده ليحيطها في حنان و قال متخابثا ( لو عرفتي تاخديه منه شوية وتشبعي حرمان الطفولة .. انا معنديش مانع )
وامتزجت ضحكاتهم الصافية بنور قادم علي استحياء من شرفة الغرفة .. كانت الغرفة مضاءة بضوء خافت تكرهه .. لكنها لم تخف من الاشباح وقتها
لم تخف وهي معه قط !
ثم اي شبح يجرؤ علي دخول تلك الحجرة المقدسة !! .. ستقوم وقتها الملائكة بأول عمل عنيف في تاريخها وتمنعه

***

عندما اخبروها بحادث موته .. لم تصدقهم .. ببساطة لم تصدقهم .. في بداية الامر انفجرت باكية ثم فقدت الوعى لان جسمها لم يحتمل كل هذا الضغط العصبي .. وعندما افاقوها ظلت تناديه بصوت خافت وهي تخبره كم هي متعبة .. تخبره ان حولها بعض الحمقى الذين يحسبونها حمقاء اخرى لتصدق انه رحل .. وظلت تناجيه ومن حولها صامتون مشفقون .. بعضهم يمسك يدها وبعضهم يربت علي شعرها و البعض يحاول ان يتماسك ولا يبكى .. اقصد لا يملأ الدنيا عويلا فكلهم باكون .. فقد كان مشهدها وهي راقدة شبه غائبة تخاطب من لم يعد في عالم الدنيا و تحدثه بكل هذا الحب يمزقهم اربا اربا

لم تصدق احد منهم حتى رأت امه .. رأت ذلك الوجه الشاحب الملتاع الثاكل .. وقتها صدقت حقا ان لهذه الام ابنا .. قد مات

مات الحبيب .. وهى فى شهرها التاسع .. مات حبيب صغير ليأتى حبيبه الاصغر الي هذه الدنيا
تذكر وقت ولادتها .. عندما حانت لها الفرصة للصراخ اخيرا .. صرخت بكل ما فى وسعها .. لم تكن صرخات ام تلد .. ابدا لم تكن

ويجىء للدنيا طفل يملأ الدنيا صراخا .. ويملأ حوائط غرفته شخابيطاً .. ورث من امه جمالها واخذ من ابيه عينين حساستين ذكيتين .. يا لهما من عينين !

" ماما .. انتي جيتي ؟ "
ايقظها صوت ابنها من ذكرياتها فشعرت بخفقة حنونة في قلبها وهي تسمع صوته الناعس .. يقف علي باب غرفته ينظر لها بعينين شبه مغلقتين و هي واقفة في الظلام .. انارت النور وتحركت ناحيته و ضمته لها .. ظلت دافنة رأسه في بطنها و هى تربت على شعره برفق ..
" ماما .. مالك ؟ "
انتبهت فجأة ان ابنها شبه مستيقظ ليجد امه تقف في الظلام وهي تكرهه و لا تجيب اسئلته و تضمه بدون حرف .. لابد ان يبدو هذا غريبا لابن السابعة .. " ياااااااه .. سبع سنوات كاملة يا أحمد .. سبع سنوات دأبت فيهم علي اعداد الطعام الذى تحبه .. و ارتداء ما تحب ان ترانى فيه .. دأبت ان احكى لك اخر مغامرات ابننا واقص عليك فرحة كيف ان مدرسينه يحبونه ويلقبونه بالعبقرى الصغير " ..
ايقظت نفسها قسرا من الذكريات التى تأبى رحمتها اليوم .. و ابعدت ابنها عنها في رفق وهى تقول : " مش عاوز تاكل ؟ "
" لا مش عاوز " قالها بنبرة متغاضبة .. لانها تأخرت اليوم .. قالت في مرح : " طب مش عاوز تتزغزغ ؟" وحركت يديها علي صدره الصغير بحركات تعرف انه يتأثر لها للغاية .. ضحك في مرح وهو يجرى من يديها فجرت ورائه وهي تتوعده .. " مادام مش هتاكل يبقي هتتزغزغ يعني هتتزغزغ "
...

وبعد مطاردات دامت عشر دقائق استسلم منهكا: " خلاص هاكل .. بس متأخريش كده تاني ! "
قبلته في حب وهي تعده انها لن تتأخر ثانية ..
و تحركت لتغير ثيابها وتعد لها ولابنها الطعام ..

***

زعلى طول انا وياك .. وسنين بقيت
جرّب فيهن انا انساك .. ما قدرت نسيت

***
لم تعد تتذكر وجهه .. تقريباً
يا لهذه الدنيا ..اختارت من بين احب الاحباء واحدا لتجعلها تنساه .. تجعلها ما ان ترى نظرة رقيقة حنونة في وجه احدهم حتي يخفق قلبها بعنف و تتخيل باقي هذا الوجه لاحمد .. ما ان ترى احدهم يضحك ضحكة صافية حتى تتعلق نظراتها به و تتابعه لتتأكد انه ليس هو
على ان اكثر من اشعرها بهذا كان ابنها وعم ابنها .. هناك لحظات ما تسمع فيها صوت عم ابنها من بعيد فتكاد تقسم انه صوت احمد .. و لم تكن قليلة هي المرات التى اخطات فيها ونادته بأحمد ..
ولم تكن قليلة كذلك المرات التى تلمح فيها وجه ابنها من زاوية ما فتشعر انه ( أحمد ) سيلتفت لها الان ليخبرها بشىء ما ..

كثيرا ما طلبها احدهم للزواج مع وعد برعاية ابنها بعد ترملها .. لكن رفضتهم جميعا بدون تفكير .. لم تكن لتترك تلك الشقة الصغيرة الممتلئة بأشباح الذكرى والاشباح الاخرى محترفة الاختباء وراء قطع الاثاث
تلك الاشباح المضحكة .. الان بعدما مر العمر .. تتذكرها فقط لتتذكر تلك اليد الحانية القوية التي تحيطها برفق و تضحك في مرح من مخاوفها .. مرح رقيق لا يؤذى .. فقط تنتقل لها عدواه فتضحك هى الاخرى من مخاوفها
سبحان من خلق رجالا بتلك القوة وذلك الحنان .. غريبة حقا ان ( القوة ) مؤنثة اما ( الحنان ) فمذكر !

لم تعد تتذكر وجهه .. ولم تعد تتأمل صوره
لكن يكفيها ان تتذكر ذكراه

***

كبر ذلك الصغير .. لم يعد طفلا يتغاضب منها لتأخرها في عملها .. ولم يعد مراهقا يجيد اصطناع الغضب عندما ترفض له طلبا ما .. بل صار رجلا
رجل .. ذات الثلاثة حروف التي ما ان كانت تسمعهم حتى يتبادر الي ذهنها صورة حبيبة خفت ذكراها لكن ما زالت باقية .. صورة أحمد
الان جاءت صورة عذبة اخرى لابنها وهو واقف بجوار عروسه و عمه واقف بجانبه .. يحاول ان يتماسك ولا يبكى لأنه يظن ان الدمع ليس للرجال ..
لكن تطفر دموعه رغما عنه عندما تقترب منه هى وتقبل رأسه و تقبل عروسه فى حنان .. تمسح دموعها سريعا و تبتعد حتى لا يبكى اخرون .. لقد لمحت عمه يتماسك قسرا هو الاخر

لابد من لحظة ما في اوج فرحتك تتذكر فيها كل من كان يمكن ان يشاركك تلك الفرحة وتشعر بذلك الدفء اللاذع للذكرى .. تضحك فتتمنى ان تكون الضحكة ضحكتين .. و تعود لتمسح تلك الدمعة الهاربة بعد ضحكتك وتتمنى مرة اخرى ان تكون هناك يد اخرى تمسحها لك

عادت الى بيتها وحيدة .. لاول مرة تعود وحيدة .. لن تجد شبحا صغيرا علي باب الغرفة المقدسة يسألها .. " ماما انتي جيتي ؟ " .. لن تجد ألعابا متناثرة .. ولا وريقات كتب عليها شعر ما ينبئها ان ابنها صار مراهقا يمارس كل ما يمارسه المراهقون .. لن تدخل الى الحمام فتجد تلك الشعيرات السوداء المتناثرة في قاع الحوض الابيض المتخلفة من حلاقته لذقنه .. يا لها من تفاصيل صغيرة دافئة ..

فكرت في تغيير ملابسها والنوم .. و لم تستطع النوم بعد محاولة تنفيذ الفكرة ..
قامت من فراشها في هدوء و اتجهت الى غرفة ابنها لتحاول النوم هناك .. وهى في طريقها الى فراشه لمحت ذلك الكرسى الهزاز .. وتذكرت فرحتها عندما رأته اول مرة ..

جلست عليه و بدأت تتأرجح في رفق .. " شفت يا احمد .. ابننا اتجوز " .. " اه يا حبيبتي شفت "
التفتت غير مصدقة .. لتجد أحمد جالسا على الفراش خلفها وهو يحدق فيها بتلك النظرة الحانية متبسماً .. " احمد ؟؟؟ انت هنا بجد ؟ "
تحركت ناحيته في بطء خائف .. مدت يدها في رفق لتلمس وجهه .. شعرت به حقيقيا دافئا بشريا جدا .. صرخت في فرح صرخة عالية .. هنا ضحك هو في رفق وهمس : " ششششششششش " .. و رفع جسده و وقف امامها .. نظر لها طويلا ثم ضمها .. ضمها حتى سمعت دقات قلبه تحت اذنيها .. مع انه اسمه ُمحى من سجل الاحياء طويلا .. فما زال قلبه يدق

حملها في رفق واجلسها علي الكرسي الهزاز .. " نامى يا حبيبتى " .. حاولت ان تتمسك به لكنه ابتعد عنه في رفق قائلا : " متخافيش .. انا مش هبعد .. انا هنا "
ظل واقفا امامها و جفناها ينغلقان تدريجيا .. و نامت في سلام كالاطفال
***
وجدها ميتة في الصباح التالى .. وجسدها يتأرجح في رفق على كرسى هزاز فى حجرة ابنها الصغير ..
وفي يدها ورقة صغيرة كانت تسطر فيها حلم راته قبل موتها .. وفي اخر الورقة اقتباس من اغنية فيروز الحبيبة :

واكتبلك ع ورقة حتى ما اقول .. ما بقدر اقول
يا ريتك مش رايح .. يا ريتك تبقى ..
تبقي ع طول

على سبيل التذكير

انا عندى في البيت كانوا بيقولولي انتي اتولدتي في رمضان بس عمرهم ما افتكروا اليوم تحديدا و السنة اللي فاتت علي يوم 8 رمضان تقريبا عملت شوية حسابات وجبت صفحة نت كده بتحسب انا تاريخ ميلادي امتي بالهجري .. و اكتشفت انه 12 رمضان 1407

ويوم 12 رمضان عملت لنفسى بوست واحتفلت بعيد ميلادى بالهجرى .. والبوست اهو

هو الحقيقة انا مبحبش النرجسية الزائدة دي .. واني اعمل لنفسى موضوع لتواريخ لا تهم احدا غيري .. بل انى اشك انها تهمنى انا من الاساس سواء هجرية او ميلادية

عملت موضوع السنة اللى فاتت على سبيل الطرافة .. و موضوع السنة دى على سبيل التذكير

ان الطفلة .. او من تظن نفسها طفلة .. قد كبرت و صار عمرها علي مشارف العقد الثالث ..

موضوع السنة دى على سبيل الوقفة مع النفس ..

- ماذا عملت لى ؟ ماذا عملت لدنياى ؟ .. و الاسوأ .. ماذا عملت لاخرتى ؟؟؟

وانظر لى .. اجدنى قد اكتسبت علما واسعا وحبانى الله عقلا اظنه يفهم الصحيح من الخطأ .. واعطانى الله نفسا سوية وفطرة مستقيمة فلوثتها
ولم استخدم عقلى وصرت اخطأ بلا فهم او تفكير

او ربما فكرت فأخذت السبيل الخاطىء ..

ظلمت نفسى اوى .. و تقريبا مع كل اللي ربنا اداهوني من نعم مستخدمتش حاجة فيها بشكل عدل يوحد ربنا ..

ومؤخرا فقط استوعبت مدى ما اخطأت فيه وما اذنبت وما ضيعت .. ولا أجد الا الندم

20 سنة هجرية .. تحصى علىّ حركتى وسكوني منذ ما يقرب من تسع سنوات ..
ماذا فعلت بهنّ ؟؟

لاشى تقريبا الا كل ما هو ليس بفائدة .. وان كان بفائدة فأنا لم استفد ولم افد احدا ..

- ماذا فعلت لأهلى .. ؟

الحمد لله رب العالمين .. ربنا رزقنى بأخت احبها فوق ما يتصور أحد .. و رزقنى بأب وام واخ ولد احبهم جدا .. حنينين عليا جدا و مستعدين يعملوا اي حاجة من اجل اسعادى
عرفت معنى كلمة عائلة .. وعرفت معنى كلمة ان يرزقك الله بسكن وأهل
ربنا يكرمهم كلهم ويبارك فيهم ويحفظهم من كل سوء

وطبعا مفيش شك اني مهما عملت مش هقدر اديلهم كل الحب والحنان اللي باخده .. يعني شخص هيعمل ايه قدام 4 اشخاص اخرين يحبونه هكذا !!
لا أظن انى قد بررتهم بما يرضى ربنا حتى الان ..

وكل أملى ان رحمة الله واسعة ..

- ماذا فعلت بأسلامى ولأسلامى ؟؟
فى يوم هقف قدام ربنا اتحاسب .. كل شىء هتحاسب عليه هيكون ليا الا علمى هتحاسب انا علمته لحد ولا لأ .. وهل هو علم صحيح ام خاطىء

مش عاوزة اوجع دماغكم بحوار مع نفسى السقيمة .. بس نصيحة لكل حد قرا الكلام دا ..

راجعوا نفسكم .. اني اخاف علي نفسى وعليكم .. ان تخسر الجنة واحدا .. وتكسب النار واحدا

اللهم اني استغفرك واتوب إليك .. و اسألك الاخلاص و التخلص من الرياء